02.23.05
Posted in الأطباق الرئيسية at 1:24 am بواسطة السيدة ماما
السلام عليكم
يايبتلكم طريقة اكلة ان شاء الله تعيبكم .. طبعا الطبخة اكييييييييييييييييد مألوفة .. بس طريقة طبخها مختلفه
دياي محشي بشوربة ماجي
المقادير
دياية مقاس كيلو و شويه
باكيت شوربة ماجي (شوربة خضار)
خمس ملاعق اكل زبده
بقدونس مفروم
خمس حبات بطاطا متوسطة مقطعة قطع متوسطة الحجم
الطريقة
اخلطي اربع ملاعق زبدة مع محتويات باكيت الشوربة و شوية بقدونس مفروم
بعد ما تنظفين الدياية شيلي الجلد الي على الصدر و الريول بدون ما تنزعينه .. دخلي اصابعج بين جلد الدياية و لحمها
احشي المكان الي فتحتيه بالخليط (احتفظي بمقدار ملعقة و نص كبار من هاي الخلطة) .. صدر اليايه و ريولها و اي مكان توصله ايدج تحت الجلد .. اربطي ريولها و حطيها في قالب الشوي
سيحي ملعقة الزبده الزايده و اخلطيها مع شوية الخلطة المحفوظة و بقدونس وصبي على قطع البطاطا و اخلطي و بعدين صفيهم حوالين الدياية
اشويها في فرن حرارته 350 مدة ساعة و نص
ترا الطريقة واااااااااااااااااااايد بسيطة و سهلة و سريعة
و بالعافية عليكم
سامحوني على الصورة شكلها يضحك و ما كنت ابغي احطها بس احب اضيف صور لكل وصفة اكل اشاركبها
Permalink
02.21.05
Posted in الحلويات at 1:34 am بواسطة السيدة ماما
اليوم يايبتلكم طريقة كيكة من ألذ الكيكات الي اسويها .. فعلا وااااااااااااااااااااااااااااا اااااييد لذيذة ، و طريقتها بعد أسهل و أسهل ، مع ان الي بيشوفها ما بيصدق
كل حد كلها اتخبل عليها .. يعني استريحوا مضمونه
أنا عطيتها ها الاسم ، لان فيها خليط من فواكه استوائية .. قلت خلني اسميها كيكة هاواي .. بصراحة ما ادري اذا اصلا في كيكة بها الاسم او لا .. (حقوق الطبع محفوظة عندي)
أتمنى ان كلكم تجربونها لحلاوتها ، و للأعجاب الي بتلقونه من الي بيطعمها .. و بتقولون السيدة ماما قالت 
المقادير
كوبين طحين منخول
2 م ص بيكنغ باودر
1 1/2 م ص بيكنغ صودا
1 م ص ملح
2 1/2 م ص جرفة
كوبين سكر
4 بيضات
1 1/2 زيت
كوبين جزر مبشور ناعم
1/3 كوب جوز مفروم
علبة صغيره اناناس مفروم ناعم
كوب رقائق جوز الهند
الطريقة
شغلي الفرن على 350 و ادهني ثلاث قوالب دائريه مقاس 9 انتش
انخلي المقادير الخمس الاولى مع بعض في ماعون كبير
بعدين ضيفيلها السكر و البيض و الزيت و اخلطي بالخلاط يلين ما يمتزجون
ضيفي الباقي و اخلطي بملعقة كبيره يلين ما يمتزجون
صبي الخليط بالتساوي في القوالب و دخليهم الفرن مدة 35-40 دقيقة
طلعيهم و خليهم يبردون 10 دقايق
بعدين طلعيهم من القوالب و خليهم يبردون تمام
بعد ما يبردون سوي التلبيسة
مقادير التلبيسة
1 جبنة فيلادلفيا 200 جرام(حرارة الغرفة)
1/4 ذايبة كوب زبدة
1 1/4 م ص فانيلا
كوبين سكر ناعم
اخلطيهم كلهم مع بعض بالخلاط يلين ما يصيرون مثل الكريمه
الخطوة الاخيرة
حطي وحدة من الكيكات في طبق التقديم بعدين ادهنيها شوي من التلبيسة ، حطي فوقها كيكة ثانيه و ادهنيها ، و الثالثة و ادهني الكيكة كلها
للتزيين انا احمر شوي من رقايق جوز الهند و ارشها عليها من فوق
ملاحظة
بعد ما تلبسون الكيكة يفضل انكم تحطونها بالثلاجة عشان تجمد التلبيسة عليها شوي
Permalink
02.19.05
Posted in الحلويات at 5:55 am بواسطة السيدة ماما
السلام عليكم خواتي
اليوم يايبتلكم طريقة كيكة بعد حلوة .. الحمدلله كل الي ذاقها عيبته .. المميز فيها اسمها .. Black Majic .. “السحر الاسود” .. و الله مش انا مسمتنها ، اسمها كان جي في الكتاب .. يمكن عشانها سوداء ، و طعمها له مفعول السحر
ان شاء الله اتجربونها و تعيبكم انتو بعد
المقادير
كوب و ثلاثة ارباع كوب طحين
كوبين سكر
ثلاثة ارباع كوب مسحوق كاكاو
2 م ص بيكنغ صودا
1 م ص بيكنغ باودر
1 م ص ملح
بيضتين
كوب قهوه قوية (يعني 2 م ك نسكافيه في كوب واحد ماي)
كوب لبن
نص كوب زيت
1 م ص فانيلا
الطريقة
* ولعي الفرن على 350 و ادهني قالب (الي مفتوح من النص) و رشي بالطحين
* انخلي كل المقادير الجافة و ضيفيلها المقادير الباقية
* و اضربيها بالخلاط دقيقتين على سرعة متوسطة (العجين بيكون سائل)
* اخبزيها في الفرن مدة 30 - 40 دقيقة
تلبيسة الكراميل
كوبين كريما مخفوقة
ثلاثة ارباع كوب سكر اسمر
1 م ص فانيلا
شوية كاكاو مبشور
الطريقة
اخلطي كل المقادير-ماعدا الكاكاو- بالخلاط الكهربائي يلين ما تصير غليظة شوي
صبيها على الكيكة و رشيها بالكاكاو المبشور
ملاحظة
* الأفضل تقطعين الكيكة قبل لا تصبين عليها التلبيسة .. عشان ما تكون صعبة في التقطيع بعدين
* أو تقدرين ما تلبسين الكيكة و اتحطين الكراميل في ماعون ثاني ، و كل ما تقدمين حق حد تحطين شوي من التلبيسة على الكيكة .. أنا افضل احط التلبيسة من قبل و خلاص افتك .. على كيفكم
Permalink
02.17.05
Posted in الحلويات at 1:52 am بواسطة السيدة ماما
أنا أموووووووووووووووت في الكريم كراميل و مش أي طريقة تعيبني .. لأن دايما أخاف من طعم البيض فيه عشان جي دايما أفضل أسوي الجاهز بس لقيت هاي الطريقة في مجلة أجنبية و قلت خلني أجربها لأنها سهلة و مقاديرها كانت متوفره بعد ما سويتها و طعمتها تيننت عليها و اليوم الثاني كنت معزومة و سويت وحده و خذتها معاي .. النسوان تخبلوا من لذتها كل وحدة تبا طريقتها .. لا و بعد في الي زعل لما ما لقى حصة ثانيه .. طبعا انا ما عطيتهم الطريقة .. قتلهم الي تباها تتصل فيني بالتيلفون
المهم انا قلت خلني أكون كريم و أشاركم الطريقة لأن ما شاء الله انتوا ما تقصرون من الوصفات الحلوه
المقادير
3/4 كوب سكر
200 جرام جبنة فيلادلفيا
حليب مركز 397 جرام
حليب بوقوس الكبير (أعتقد 357 جرام)
ملعقتين صغار فانيلا
خمس بيضات
الطريقة
* طبعا تحمرين السكر على نار متوسطة .. لما يصير أحمر غامق صبي على طول في قالب الكريم كارميل عشان ما ييبس و حطي على طرف
*الحين حطي الجبنه في ماعون و اضربيها بخلاط الكيك عشان تصير مثل الكريمه ، بس اذا كانت يابسة بتتعلق في المضرب .. ابدي ضيفي البيض .. بيضة .. بيضة .. يعني بعد اضافة كل بيضة اضربي الكريمة شوي عشان تخلطينهم و بعدين حطي الثانيه
*بعدين ضيفي الحليب المركز و بوقوس و الفانيلا .. اخلطيهم زين و صبيهم على السكر
* حطي قالب الكريم كراميل في جدر أكبر و صبي في الجدر الكبير ماي مقدار 2 سم من القالب * ولعي الفرن على 350 و خلي مدة 50-60 دقيقة
* بعدين طلعي و خلي القالب يبرد عدل .. تقريبا ساعة و نص
* بعد ما يبرد حطي في الثلاجة يلين اليوم الثاني .. يعني خلي يبات فيها
* طبعا عند التقديم فكي اطراف الكريم كراميل بسكين و بعدين حطي صحن عليها و اجلبيها
و صحتين و عافيه
ان شاء الله بعد تعيبكم انتو
ملاحظات
* قوام الكريم كراميل بيكون شوي يابس عشان الجبن
* أنا مره حطيت هيل بالاضافة للفانيلا لأني كنت أحاتي طعم البيض .. بس ما خرب و بعد ما كان له داعي
* لما تون اطلعونها من القالب يمكن تاخذ شوية وقت ، لا تستعيلون .. اذا كنت مستعيلين ييبو جدر في ماي حار و حطو فوق القالب عشان الحراره تساعد
Permalink
02.13.05
Posted in الحلويات at 2:08 am بواسطة السيدة ماما
الحلو ها وايد لذيذ .. يتراوالي وايد مكرر ، بس طريقتي سهلة و لذيذة .. مع القهوة .. رووووووووعة
طريقة معجون التمر
كوبين تمر بدون نوا
كوب ماي
شوية هيل و ملح و عصرة ليمون
تحطين كل ها المقادير في جدر و تطبخينه على نار متوسطة 12 دقيقه و تخلينه يبرد فيما انت تسوين العجين
المقادير
صبع و نص زبدة
كوب و نص طحين
كوب و نص شوفان (كويكر)
كوب سكر اسمر
نص ملعقة صغيره بيكنغ صودا
الطريقة
سخني الفرن على 350 و ادهني قالب مربع 9*9 انتش
اخلطي كل المقادير مع بعض و افركيهم باطراف اصابعج
رصي ثلثين العجين في قاع القالب و اطرافه
صبي عليه معجون التمر و عدلي السطح
غطيه بباقي العجين
و حطي في الفرن 35 دقيقة
طلعيه و خليه يبرد تمام قبل ما اطلعينه من القالب و تقصصينه
ملاحظة
العجين بيكون شكله وايد هش حتى ما بتصدقين ان بيكون متماسك بس بعد الطبخ و بعد ما تخلينه يبرد بيكون يابس بس يذوب في الحلج
ياللا همتكم .. روحوا جربوا و ادعولي
Permalink
02.12.05
Posted in الحلويات at 1:29 am بواسطة السيدة ماما
ان شاء الله تعيبكم الاكلة .. بصراحة كل حد ذاقها عيبته .. ان شاء الله تعيبكك
المقادير
200 جرام جبنة فيلادلفيا
نص كوب سكر
بيضة مضروبة
نص ملعقة صغيرة ملح
كوب حبات الكاكاو الصغيره (chocolate chips)
كوب و نص طحين
كوب سكر
ربع كوب بودرة الكاكاو
ملعقة صغيرة بيكنغ صودا
نص ملعقة صغيرة ملح
كوب ماي
ثلث كوب زيت ذرة
ملعقة أكل خل
ملعقة صغيرة فانيلا
الطريقة
اخلطي الجبن مع البيضة و نص كوب السكر و شوية الملح بالخلاط يلين ما تصير كريما ناعمة بعدين ضيفي حبات الكاكاو و اخلطيهم عادي بالملعقة
و خليهم على جنب
انخلي الطحين و السكر و الكاكاو و الملح و الصودا و ضيفيلهم باقي المقادير و اخلطيهم بخلاط الكيك الى ان يمتزجون
ييبي قالب الكب كيكز بو 12 حبة .. و املي ثلث كل كبكيك .. و بعدين ييبي الجبن و صبي مقدار ملقعة أكل على كل واحد
و حطي في الفرن على درجة 350 من 20 الي 25 دقيقة
ملاحظة:
لا تدهنون القوالب و لا تحرون الفرن من قبل .. مش مشكله كان اذا شوية حار
المقدار يسوي من 18 الى 20 كبكيك
بالعافيه عليكم
Permalink
02.06.05
Posted in الحلويات at 3:03 am بواسطة السيدة ماما
ها التشيز كيك لذيييييييييييييييييييييييييييي ييييييذ وااااااااااايد واااااااااااااايد .. بس يبغيله شغل و وقت .. انا ما اسويه الا حق مناسبة خاصة .. او حق حد عزيز .. يا ريت تجربونها .. بتعيبكم
المقادير
الطبقة الاولى
كوب بسكوت كاكاو مطحون -اي نوع ، المهم بني
3 م ك سكر
3 م ك زبده
الطبقة الثانيه
4 فيلادلفيا 200 جرام -يعني المجموع 800 جرام
كوب و نص سكر
5 بيضات
كوب و نص كريما سايله
ربع كوب طحين
2 م ص فانيلا
10 حبات مارس من الصغار مقطع مكعبات - يعني كل حبة مارس تقصينها اربع مكعبات
الطبقة الثالثة
(طبقة الكاراميل)
كوب سكر اسمر
اصبع زبده
ربع كوب حليب
للزينة
كاكاو مذوب في حمام مائي
كريما مخفوقة
5 او 6 حبات مارس صغار -كل وحده مقصوصة نصين بشكل مايل
الطريقة
الطبقة الاولى
اخلطي كل المقادير عدل و رصيهم في قالب التشيز كيك في القاع و الاطراف بطول 2 سم
حطيهم على جنب
الطبقة الثانيه
اخفقي الجبن بمضرب الكيك يلين يصير ناعم
ضيفي السكر و اخفقي
ضيفي البيض وحده وحده و اخفقي
ضيفي المقادير الباقية و اخفقي
صبي نص كمية الخليط على الطبقة الاولى و حطيهم في الفرن مدة 40 دقيقة
طلعي من الفرن و خلي يبرد شوي
الحين المارس المقطع حطي على ها الطبقة ، بس حاولي ما تلصقينه في اطراف القالب
صبي باقي خليط الجبن و حطي في الفرن بعد 40 دقيقة
بعد ال 40 دقيقة سكري الحرارة و خلي الكيك في الفرن مسكر عليه مدة نص ساعة
طلعيه من الفرن و خليه يبرد تمام -بيطول ، تدرون لأن كتلة الجبن ثجيلة و ما بتبرد بسرعة-
حطي في الثلاجة لليوم الثاني
الطبقة الثالثة
اخلطي كل المقادير مع بعض و حطيها على النار يلين ما تغلي .. و خليها تغلي 3 دقايق عشان شوي تغلظ
برديها .. بس لا تخلينها وايد بارده لانه بعدين الكاراميل بيتجمد و ما بيكون سهل تلبسينه الكيك .. يعني شوي دافي
عاد زيني على كيفج
بالنسبة لي .. انا احط الكاكاو الذايب في كيس ، و ارسم على الكيكة مثل ما تشوفون
بعدين اسوي وردات بالكريما المخفوقة و على كل وردة احط مارس
و هني و عافيه
Permalink
02.05.05
Posted in الحلويات at 1:11 am بواسطة السيدة ماما
السلام عليكم عزيزاتي
أكيد كيكتي اليوم بتعيبكم .. كيكة جزر محشية بجبنة فيلادلفيا ، و ممزوجة بنكهة القرفة و الجوز .. وااااااااااااااااااااااااااايي د سهلة و سريعة .. خصوصا اذا كنت باشرة الجزر من قبل .. يعني بس تعالي و اخلطي و حطي في الفرن .. أنا ما أحب أبشر جزر ، فإذا حد طلبها اخليه يبشر الجزر و بعدين اسويها .. ما بطول عليكم .. هاي طريقتها
مقادير الحشوة
200 جرام فيلادلفيا
ربع كوب سكر
بيضة
طريقة الحشوة
اخلطي المقادير و اضربيهم بمرض الكيك يلين ما يتجانسون و حطيهم على جنب
المقادير
كوبين طحين
كوب و ثلاثة ارباع كوب سكر
2 م ص بيكربونات الصودا
2 م ص قرفة
1 م ص ملح
كوب زيت
3 بيضات
3 اكواب جزر مبشور
نص كوب جوز مفروم
الطريقة
* حمي الفرن على 350 و ادهني قالب مفتوح من النص
* اخلطي كل المقادير مع بعض و اضربيها بمضرب الكيك مدة دقيقتين او شوي زيادة يلين ما يمتزجون عدل
* احتفظي بمقدار كوبين من العجين و صبي الباقي في القالب
* ييبي الحشوة و حطيها في العجين بواسطة الملعقة ، و حاولي تساوين في التوزيع
* صبي باقي العجينة المحفوظة على خلطة الجبن
* و حطيها في الفرن مدة 55 دقيقة او يلين ما تستوي
* برديها في الفرن 10 دقايق
* و برديها تمام برع
* اقلبيها في صحن التقديم و رشيها بسكر بودره للزينه
* و شوفو محلا شكلها
هني و عافية على قلوبكم
Permalink
Project-Id-Version: WordPress v1.2.1 - Arabic Language
Report-Msgid-Bugs-To:
POT-Creation-Date: 2004-05-22 18:59-0500
PO-Revision-Date: 2004-12-17 15:12+0300
Last-Translator: Sewar
Language-Team: Sewar
MIME-Version: 1.0
Content-Type: text/plain; charset=utf-8
Content-Transfer-Encoding: 8bit
X-Poedit-Language: Arabic
X-Poedit-Country: SAUDI ARABIA
X-Poedit-SourceCharset: utf-8
Project-Id-Version: WordPress v1.2.1 - Arabic Language
Report-Msgid-Bugs-To:
POT-Creation-Date: 2004-05-22 18:59-0500
PO-Revision-Date: 2004-12-17 15:12+0300
Last-Translator: Sewar
Language-Team: Sewar
MIME-Version: 1.0
Content-Type: text/plain; charset=utf-8
Content-Transfer-Encoding: 8bit
X-Poedit-Language: Arabic
X-Poedit-Country: SAUDI ARABIA
X-Poedit-SourceCharset: utf-8
· Next entries »
