السيدة ماما

كيكة الاوريو

السيدة ماما — Sat, 14 Jan 2006 17:27:00 +0000

السلام عليكم بنات
شحالكم .. شخباركم ؟ .. عساكم بخير ان شاء الله .. من زمان ما حطيتلكم شي .. سامحوني .. بس اليوم يايه و جايبه معاي شي .. ان شاء الله راح يعجبكم .. كيكة الاوريو عجييييييييييييييييييييييييييبه و سهله و شكلها وااااااااااااااااااااايد حلو و يشرف
و هاكم المقادير و الطريقه .. ان شاء الله تعجبكم

المقادير
24 حبة اوريو
1/3 كوب طحين
نص اصبع زبده
1/3 كوب حبيبات الكاكاو
1 خليط كيك جاهز
3/4 كوب ماي او حليب
بيضتين
كوب سكر مطحون
4 م ص حليب

الطريقة
- سخني الفرن على 350 فهرنهايت
- كسري الاوريو -انا استخدم السكين لفرمه عشان ما يكون ناعم- و اخلطيه مع حبيبات الكاكاو و الطحين و الزبده .. و خليه على جنب
- جهزي خليط الكيك و صبي نصه في القالب و حطي عليه كوبين من خليط الاوريو و بعدين حطي باقي خليط الكيك و فوقه باقي الاوريو و رصيه في العجين
- اخبزي الكيكه لمدة 45 الى 50 دقيقة .. او الى ان تستوي
- برديها على الشبك لمدة عشر دقايق و طلعيها من القالب و رديها على الشبك
- خليها تبرد عدل .. خلطي السكر مع الحليب و زينيها مثل الصوره

و بالعافيه عليكم

كيكة المقبلات

السيدة ماما — Sat, 14 Jan 2006 17:17:00 +0000

السلام عليكم خواتي
طبعا اليوم جايبتلكم هذا النوع من المقبلات .. شكله مثل ما تشوفون حلو و يلفت النظر ، يعني حلو حق العزايم و الجمعات .. بس احلى شي اذا سويتيه مع مشاوي
و تقدرون تسوونه قبلها بيوم .. هو اصلا يبغيله يقعد في الثلاجه شوي .. اهم شي يكون القالب متوفر عندكم .. قالب لوف عادي ، الافضل القالب مقاس ست اكواب -يعني يكفي اذا صبيتي فيه ست اكواب ماي-

و هاي المقادير
2 فلفل بارد احمر مقطع ارباع
2 فلفل بارد اصفر مقطع ارباع
1 باذنجان كبير مقطع شرايح طويله
2 كوسا مقطع شرايح طويله
نص كوب زبيب
1 بصله حمراء مقطعه شرايح
1 م ك معجون طماط
2 م ك خل
كوب و نص عصير طماط
كيس جيلاتين
زيت زيتون

الطريقه
- حطي الفلفل تحت شواية الفرن يلين ما يبدأ يسود شوي و بعدين شيليه و حطيه في كيس بلاستيك
- ادهني قالبين فرن بزيت زيتون و حطي الباذنجان و الكوسا كلن في قالب و اشويهم .. و اقلبي الخضار في نص مدة الشوي
- اقلي البصل و الزبيب و معجون الطماط و الخل يلين ما يثخن
- هاتي ثلاثة ارباع كوب عصير طماط و حطي في قدر صغير على نار هاديه و ذوبي الجيلاتين فيه
- الحين هاتي القالب و ادهنيه بزيت و بطنيه بالورق الشفاف
- حطي طبقة فلفل احمر بعيدين اصفر بعدين كوسا بعدين باذنجان و بعدين خلطة البصل و كرري الطبقات .. بس خلطة البصل مره وحده .. بس بعد كل طبقة رشي شوي من خلطة العصير و الجيلاتين و رشي شوي ملح و فلفل اسود
- صبي باقي العصير عليه -اذا حسيتي انه وايد في عصير ما في داعي لها الخطوه- و - بعدين رصي شوي عليه بيدك عشان تطلع السوايل الزايده و غطيه بالورق الشفاف و حطيه في الثلاجه اقل شي ست ساعات
- تقدرين تسوين صلصله -عباره عن زيت زيتون و خل و ملح و فلفل اسود- و تقدمينه معاه

و بالعافيه على قلوبكم

خبز الخمير الاماراتي

السيدة ماما — Mon, 28 Nov 2005 10:49:00 +0000

السلام عليكم خواتي

اليوم يايبتلكم طريقة خبز الخمير .. بصراحة هاي اول مره اسويها .. و الله اطالع الصوره و مش مصدقة اني انا الي مسوتنه ، حتى طعمه لذيذ .. من زماااااااااااااااااااان و انا احن ابغي اسويه بس ما اتشجع ، كل على بالي صعب او يباله شغل و ما يسوونه الا الخبراء .. خذت كذا طريقة من عند كذا حد .. بس مااااااااااااااا سويتهم .. بس البارحه قلت لااااااااااااااااااازم لازم اسويه .. مشتهتنه موت و ما عندي حد يسويلي اياه .. و الجو بارد -و يا محلاة الخمير في البرد- .. بس دورت الطرق الي عندي ما لقيتهم ، و ضربت في راسي لازم اسويه .. الحمدلله لقيت طريقة في الانترنت
امي فديتها مطرشتلي المخبز التقليدي و مطرشتلي المخبز الكهرباء .. و بما اني انسانه مال اول ، استعملت المخبز التقليدي -اصلا مخبز الكهرباء ما يشتغل على كهربة امريكا-
و لازم تكون عندكم علبة معدينه خاليه -مالت البسكوت او الماكنتوش- نحط عليها المخبز
اول شي لازم تعجنين العجينه قبل ما تسوين الخبز بفتره .. يعني اذا ناويه اتسوينه الصبح ، اعجني بالليل .. و اذا ناويه اتسوينها حق العشاء اعجنيها الصبح بدري
على فكرة ما عليكم من الكلام الي انا كاتبته وايد و بتقولون الطريقة صعبه و معقده .. بس تراني احاول اشرحلكم عدل عشان اسهللكم الطريقه

سموا بسم الله

مقادير العجين
كوب و نص طحين رقم 1
كوب و نص طحين رقم 2
1 م ك خميره
نص كوب ماي دافي للخميره
كوب مريس (كوب تمر منقوع في كوب ماي مغلي)
نص م ص مثيبه حب
بيضتين

طريقة العجين
- ذوبي الخميره في نص كوب الماي مع اضافة شوية سكر و طحينض
- انخلي الطحين و ضيفي الخميرة و المريس -المشخول- و البيضتين و المثيبه واعجني يلين ما تصير متماسكة -مع اضافة الماي اذا احتاج-
- و غطيها بكيس بلاستك و بطانيه و خليها تتخمر على راحتها

وقت الخبز
الافضل انج تكونين مجهزه كل شي قبل ما تبدين الشغل ، و الاغراض هي:
بيضتين مخفوقات و فرشاة -انا ضفت زعفران للبيض- ، ماي لبل اليد ، دهن -طبعا بلدي اصيل اذا متوفر ، او زبده اذا ما عندج- ، سمسم ، حرّاره
العلبة المعدنيه حطيها على عين الفرن و فوقها المخبز خليهم يسخنون
و كوري العجين في صينيه مرشوشه بطحين و غطيه بفوطه مبلله -مقدار العجين ها سوا 16 خبزه تقريبا قطر كل وحده 15 سم-

يالا نشتغل
بللي يدج عدل ، و افردي كورة العجين زين -انا فرديتها و حركة يدي دائرية، طلعت مدوره بشكل مرتب- ادهني بالبيض و رشي بالسمسم
ملاحظة .. في ناس ما تحب السمسم ، الي ما يحبه لا يضيفه .. و بعد حلو اذا رشيتيه بالزعتر -زعتر المناقيش- لذييييييييييييذ

اقلبي المخبز وجهه لداخل العلبة المعدنيه عشان يحمر الوجه ، لو خليتيها تحمر من تحت اول قبل الوجه راح اطيح الخبزه في العلبه و تحترق عشان جي ابدي بالوجه

اعدلي المخبز بعد ما يحمر الوجه و خليها تحمر من تحت شوي

و كل ما تخلصين خبزه حطيها في الحرّاره و ادهنيها بالدهن او الزبده

التقديم
قدمي الخبز حار مع الدبس -للأسف ما كان عندي دبس- او العسل او السكر و جبن كرافت

و بالعافيه على قلوبكم

تشيز كيك حلاوة الكراميل بالجوز

السيدة ماما — Wed, 31 Aug 2005 09:09:00 +0000

أدري .. أدري من زماااااااااااااااااااااااااااا ااااااان ما طليت عليكم و حطيتلكم شي من مطبخي .. انشغلت و الدنيا مشاغل .. بس لا تنسون ، من طول الغيبات ياب الغنايم
و اليوم يايبتلكم طريقه يديده في عمل التشيز كيك .. و هاي الوصفه إهداء خاص لأختنا حرم الدكتور .. تراها هي الي شجعتني و حمستني أرد أشارك معاكم

أول شي سامحوني على الصوره ، مش واضحه و بعد مش حلوه .. بس شا اسوي قلت لازم احط صوره

المقادير
كوبين بسكوت دايجستف مطحون
6 م ك زبدة سايحه
كيس حلاوة الكراميل -حطيتلكم صورة تحت- كمية 14 اونص
علبة ابوقوس صغير
نص كوب جوز مفروم
2 فيلادلفيا مقاس 200 جرام
نص كوب سكر
1 م ص فانيلا
بيضتين
نص كوب حبات كاكاو مذوبه -تشوكلت تشبز-

الطريقه
امزجي البسكوت مع الزبده و رصيهم في قاع و جوانب قالب التشيز كيك و اخبزيهم مدة عشر دقايق
ذوبي حبات الكراميل مع الحليب على نار هاديه و حركي لغاية ما يذوب
صبي على البسكوت و رشي عليه الجوز
في الخلاط اضربي الجبن مع السكر و الفانيلا و ضيفي البيض و امزجي زين
بعدين ضيفي الشوكلاته السايحه و صبي المزيج على الجوز
اخبزي في فرن 350 مدة 45 دقيقه
طلعي من الفرن و بردي برع قبل ما ادخلينه الثلاجه
بردي تمام و قدميه
و لا تنسون القهوه معاه

و بالعافيه على قلوبكم

أحلى و أطعم و أطيب كيكة برتقال

السيدة ماما — Wed, 23 Mar 2005 09:22:00 +0000

طبعا كيكة البرتقال مش جديدة عليكم .. بس جربوا طريقتي .. وااااااااااااااااااااااااااااا ااااااااااااااايد لذيذة .. و طابور عليها ينتظرون قطعة منها .. كان ودي أحطلكم صورة أحلى من هاي .. بس و الله ما عطوني فرصة أقعد أصور صورة عدلة .. و ما بغيت أنتظر يلين ما أسويها مرة ثانية و أصورها عقب .. المهم الطريقة عندكم الحين و ان شاء الله تجربونها و تعيبكم انتو بعد

المقادير

كوب زبدة - يعني 227جرام
كوبين سكر
6 بيضات
كوبين طحين
نص م ص روح البرتقال
3 م ك عصير برتقال
1 م ك عصير ليمون
مبشور برتقالتين -بس ناعم ، ناعمالطريقة
حمي الفرن على 350
ادهني قالب مفتوح من النص
اضربي السكر و الزبده يلين ما يصيرون مثل الكريمة
ضيفي البيضات وحدة ورا الثانيه مع الضرب المستمر
ضيفي المقادير الباقية و اخلطي عدل
صبي الخليط في القالب و خليه في الفرن 45 دقيقة او لغاية ما تستوي
برديها في الفرن 10 دقايق
و بعدين طلعيها وخليها تبرد

الحين سوي التلبيسة

مقادير التلبيسة
كوبين سكر ناعم
4 م ك عصير برتقال
نص م ص روح البرتقال

طريقتها
اخلطيهم كلهم مع بعض و صبيهم على الكيكة الدافيه .. كل ما بينزل في الصحن ، ردي شيلي بالملعقة و صبي على الكيكة

و هني و عافيه

مربعات الاوريو بالشوكولاته

السيدة ماما — Thu, 17 Mar 2005 10:24:00 +0000

اليوم يايبتلكم حلاوة لذيييييييييييييييييييييذة .. ما اقدر اوصفلكم لذتها .. و الله من لذتها تحسين بالسعادة -صايره شاعره- بس صدقوني فعلا لذيذة .. خصوصا مع القهوة .. طبقة الاوريو مثل ما تشوفون سوداء و فوقها طبقة الشوكولاته بنيه .. حتى شكلها وايد حلو .. ان شاء الله كلكم تجربونها ، لأنها وااااااااااااااااااااااااااااا اييد سهله و سريعة

المقادير
24 حبة اوريو
نص اصبع زبدة
علبة حليب مركز كبير مقاس 397 تقريبا
كوبين حبيبات الشوكلاتة -chocolate chips
نص كوب جوز مفروم

الطريقة
* اطحني الاوريو و اخلطيه مع الزبده و رصي في قالب بايركس كبير -مدهون طبعا- .. القالب مقاس 13*9 انتش
* على النار ذوبي الحليب مع نص كمية الشوكولاته -لا تخلينه يغلي بس مجرد ذوبان
* صبيه على طبقة الاوريو
* و بعدين رشيه بباقي الشوكولاته و الجوز
* حطي في الفرن على درجة 350 لمدة 20 دقيقة مش اكثر
* قطعيها مربعات صغيره و صفيها بصحن التقديم ، اذا بغيتي ترصينها فوق بعض ، ياريت تفصلين كل طبقة عن الثانيه بورق الشمع عشان ما يلصقون في بعض

و هني و عافية على قلوبكم

تورتة الموكا بالمكسرات

السيدة ماما — Thu, 10 Mar 2005 10:42:00 +0000

حضري التلبيسة قبل التورتة عشان يكون في مجال تبرد

تلبيسة الموكا
نص كوب سكر
2 م ك نشا
كوب قهوة بارده
3 م ك شوكلاته مره
1 م ك زبدة
2 م ص فانيلا
كوب كريما مخفوقة (حضريه من الدريم ويب)

الطريقة
على النار اخلطي السكر و النشا و ضيفي القهوة الباردة و الشوكلاته بالتدريج و اخلطي يلين ما يتجانسون و يغلظ الخليط
خليه يغلي غلوة وحده ، بعدين ضيفي الزبده و الفانيلا
خليه يبرد تمام و بعدين ضيفيله الكريما

مقادير التورتة
6 بيضات -البياض مفصول عن الصفار
كوب سكر
نص كوب طحين
1 م ص بيكنغ باودر
كوب جوز مفروم ناعم
نص كوب بقسماط

الطريقة
* سخني الفرن و ادهني قالبين مقاس 9 انتش
* اضربي صفار البيض مع ثلاثة ارباع كوب سكر يلين ما يغلظ و بعدين ضيفي الطحين و البيكنغ باودر و اضربي زيادة يلين ما يصير الخليط ناعم
* اخفقي البياض يلين ما يسوي رغوة ، ضيفي باقي السكر و اخفقي زيادة ، ضيفيله الجوز و البقسماط
* ضيفي خليط البياض الى خليط الصفار و حركي
* صبي في القوالب و اخبزي مدة نص ساعة على درحة 350
* خليه يبرد تمام و بعدين لبسيه
* و حطي بالثلاجة

خبز مجدل محشي بفيلادلفيا

السيدة ماما — Thu, 10 Mar 2005 09:23:00 +0000

السلام عليكم خواتي اليوم يايبتلكم طريقة نوع حلو من المعجنات ان شاء الله يعجبكم .. صدقوني واااااااااااااااااااييد سهل و بسيط .. ما عليكم من طول الخطوات .. اصعب شي فيه العجن بس -يربي عضلات- بس عاد هاي خطوة لابد منها .. اسمها معجنات .. حلوة حق عشاء خفيف او على الأفطار .. يعني تقدرون تاكلونه مع الشوربة او مع عسل او خالي عادي .. لذيذ .. بنتي تاكله بدون اي شي

المقادير
كوبين طحين جميع الاستعمالات
كوبين طحين رقم 2
3 م ك خميرة فوريه
3 م ك سكر
1 1/2 م ص ملح
ربع كوب زبده -يعني نص اصبع
كوب ماي
3 بيضات مخفوقات

الحشوة
ثلثين جبنة فيلادلفيا مقاس 200 جرام
1/4 كوب سكر
1/4 كوب طحين جميع الاستعمالات
بيضة
1 م ص فانيلا
شوية جوز الطيب مطحون

للوجه
بيضة مخفوقة

الطريقة
* اخلطي كوب واحد من طحين جميع الاستعمالات مع كوب واحد من طحين رقم 2 و الخميرة و السكر و الملح في ماعون كبير
* على النار ذوبي الزبدة في الماي و خليها تبرد شوي .. بس وهي دافيه صبيها على خليط الطحين الي فوق
* ضيفي البيض
* بعدين ضيفي باقي الطحين ، بس كوب كوب يلين ما يمتزجون مع بعض
* انقليهم لسطح عليه شوية طحين و اعجني بيدك مدة من 5 الى 10 دقايق يلين ما تصير عجينه ناعمة و مطاطية و ما تلصق باليد
* رديها للماعون و يكون مدهون و غطيها و اتركيها مدة ساعة
* حضري الحشوة - اخفقي كل المقادير مع بعض
* بعد ما ترتفع العجينه قسميها نصين ، احتفظي بنص في الماعون المغطاي
* و الثانيه قسميها ثلاث اقسام
* رقي كل قسم على شكل مستطيل 30*10 سم
* و احشي بمقدار 3 م ك من الحشوة و اطوي من الطرف الطويل
* بعد الحشو جدليهم و حطيهم في قالب مدهون
* و كرري نفس الشي مع نص العجينه المحفوظ
* اتركيهم في القوالب مدة 45 دقيقة مغطايين
* و بعدين ادهنينهم بالبيض المخفوق
* و دخليهم فرن حار مدة نص ساعة

و هني و عافية

كيكة من مطبخي .. ان شاء الله تنال اعجابكم

السيدة ماما — Mon, 07 Mar 2005 19:29:00 +0000

حلوة ها الكيكة .. الطبقة الي تحت صفراء .. فوقها الطبقة البنية .. شكلها كأنها رخامية .. بس شوي .. .. لأني ما غرزت السكين بعمق عشان الحركة الرخامية تبين كأنها بس من فوق .. مش كل الكيكة .. بعد لذيذة .. ان شاء الله تعيبكم .. اهم مكون من مكوناتها هو ال sour cream .. بعض الناس يسمونه كريما لباني ، او كريمة حامضة .. اختي اذا ما كان متوفر عندها تستعمل لبنة بينار .. بس هي ما جد جربت هاي الكيكة ، يعني ما اقدر اقولكم استعملوا البينار بدال الساور كريم .. الي تبا تجرب على كيفها

ياللا سجلوا عندكم المقادير

المقادير
كوبين و ثلث طحين
كوب و نص سكر
كوب ساور كريم
ثلاثة ارباع كوب حليب
اصبع زبدة
1 م ص بيكربونات الصودا
1 م ص ملح
1 م ص بيكنغ باودر
بيضتين
1 م ص فانيلا
نص كوب chocolate syrup )الي في الغرشة البلاستيك البني و يستعملونه لتزيين الايسكريم، شفت صورته في كذا موضوع في المنتدى -أكيد تعرفونه(

الطريقة
* سخني الفرن على حرارة 350
* ادهني قالب مستطيل مقاس 13*9 انتش
* اخلطي كل المقادير مع بعض ما عادا المقدار الاخير ، و اضربيهم بالخلاط مدة دقيقتين
* احتفظي بمقدار نص كوب من العجين و صبي الباقي في القالب
* اخلطي العجينه الباقية مع chocolate syrup
* و صبي شوي شوي على العجينة الي بالقالب بشكل متساوي قدر الامكان
* بعدين هاتي سكين ، بس لا تغرزينها بعمق في العجين .. عشان التأثير الرخامي يكون بس من فوق
* دخليها الفرن مدة 40 الى 50 دقيقة او يلين ما تستوي
* طلعيها و خليها تبرد تمام و بعدين لبسيها

التلبيسة
6 م ك زبدة او زيت
9 م ك مسحوق كاكاو
كوبين سكر ناعم
ربع م ص ملح
1 م ص فانيلا
ثلث كوب حليب

سيحي الزبده مع الكاكاو على نار هاديه ، ضيفي باقي المقادير و حركي يلين ما يختلطون عدل
حطي القدر على ماعون في ثلج و حركي عشان تحصلين على تلبيسة مناسبة للدهن
لبسي الكيكة و هي بارده
خلي التلبيسة تجمد على الكيكة قبل لا تقطعينها

اذا بغيتي تزينين زيادة .. ذوبي كاكاو ابيض ، و حطي في كيس بلاستيك مخروم و زيني بنفس الطريقة الي انا مسوتنها

و بالعافية على قلوبكم

نوتيلا .. نوتيلا .. حلويات كلها بالنوتيلا .. لذيييييييييييذه

السيدة ماما — Sat, 05 Mar 2005 18:08:00 +0000

من كمن يوم اتخبلت و شريت كرتون نوتيلا ، ما ادري ليش .. ابتلشت شو بسوي به .. ادخل المنتدى ادور

اشياء فيها نوتيلا ما احصل مع اني من قبل شايفة .. بس ناسية اسامي المواضيع

على العموم دخلت السايت مال نوتيلا و شفت فيه كمن وصفة اخترت منها هاذيل و سوبتهم .. بصراحة تستاهل انكم تجربونها .. وايد لذيذة

بسكوت الجوز بالنوتيلا

المقادير
3/4 كوب زبدة -يعني اصبع و نص
1/4 كوب سكر
1/2 كوب نوتيلا
2 1/4 كوب طحين
1 كوب جوز محمص شوي و مطحون
كوبين سكر ناعم

الطريقة
* حرري الفرن على 350
* اضربي بخلاط الكهرباء الزبدة و السكر يلين ما تصير كريمة لونها شبه ابيض
* ضيفي النوتيلا و كملي ضرب
* ضيفي الطحين و الجوز و اضربي بس مش ظروري وايد
* بعدين كوري العجين كور اكبر من حبة البندق شوي
* صفيهم في صينية و حطيهم في الفرن مدة ربع ساعة
* طلعيهم خليهم يبردون شوي
* بعدين غطسيهم في السكر الناعم و حطيهم على شبك -بتلاحظين ان السكر بدا يذوب عليهم، مش مشكلة
* خلي يبرد تمام و بعدين كلوه .. اذا بغيتي سكر زياده رشي عليه عند التقديم

تراه لذيييييييييييييييييييييييييييي ييييييييييييذ .. كلت حبة و بعدين ما قدرت امسك نفسي .. وحده ورا الثانيه

بسكوت الزنجبيل بالنوتيلا

المقادير
2 كوب طحين
1/4 م ص ملح
2 م ص بيكربونات الصودا
1 م ص قرفة
1 م ص مسمار
2 م ص زنجبيل
3/4 كوب زبدة
بيضة
1 كوب سكر
1/4 كوب عسل

الطريقة
* اضربي السكر مع الزبدة بعدين ضيفي العسل و البيضة
* انخلي المقادير الجافة كلها و ضيفيها
* بتصير عندج عجينه شبه لزجة
* كوريها كور صغار قد حبة البندق و حطيها في صينية بعاد عن بعض ، لان مع الحراره بتذوب الكور عشان تسوي دوائر
* حطيها طبعا في فرن حار على درجة 350 مدة ربع ساعة
* خليها تبرد بعدين ادهني نوتيلا على حبة منها و غطيها بالثانية
* و كملي مع باقي البسكوت

بعد لذيييييييييييييييييييييييييييي يييييييييييييييييييذ ، طعم الزنجبيل في البسكوت يلسع شوي مع طعم الكاكاو .. روعة

ترافل النوتيلا بالكازو

المقادير
10 حبات اوريو
كوب كازو محمص -عادي مملح او لا
1/2 كوب سكر ناعم
3/4 كوب زبده
1 كوب نوتيلا
بخاخ زيت

الطريقة
* ييبي قالب مني كب كيكز بو 24 فتحة
*بطني الفتحات بقوالب الورق الحجم الصغير طبعا
* بخيها ببخاخ الزيت او اذا ما عندج ادهنيها شوي بزيت عادي
* اطحني حبات الاوريو ناعم
* صبي ملعقة صغيره من الاوريو المطحون في كل قالب ، و اضغطي بصبعج عليها عشان تلصق بالقاع و الجوانب
* اطحني الكازو مع 1/4 كوب سكر ناعم و ضيفيلها نص صبع زبده و هي في الخلاط ، و اطحني زياده يلين ما تصير مثل المعجون ، و حطيها على ينب
* ذوبي الزبدة الباقية مع السكر الباقي و ملعقتين كبار ماي
* ارفعيهم عن النار و ضيفي النوتيلا و حركي يلين ما يتجانسون
* صبي مقدار ملعقة صغيره من خليط النوتيلا على قوالب الاوريو
* لما تخلصين صبي مقدار نص ملعقة صغيره من خلطة الكازو على النوتيلا و اضغطي عليها شوي -انا استخدم عود الاسنان الخشب- عشان تدخل داخل خلطة النوتيلا
* اذا ما تعمقت داخل صبي شوي زيادة من النوتيلا الباقية
* برديها في الثلاجة نص ساعة و قدميها باردة

هذا الحلو يبين عليه في شغل وايد ، بس بالعكس اذا عندج كل المقادير تخلصين شغله في نص ساعة