01.14.06
Posted in الحلويات at 9:27 am بواسطة السيدة ماما
السلام عليكم بنات
شحالكم .. شخباركم ؟ .. عساكم بخير ان شاء الله .. من زمان ما حطيتلكم شي .. سامحوني .. بس اليوم يايه و جايبه معاي شي .. ان شاء الله راح يعجبكم .. كيكة الاوريو عجييييييييييييييييييييييييييبه و سهله و شكلها وااااااااااااااااااااايد حلو و يشرف
و هاكم المقادير و الطريقه .. ان شاء الله تعجبكم
المقادير
24 حبة اوريو
1/3 كوب طحين
نص اصبع زبده
1/3 كوب حبيبات الكاكاو
1 خليط كيك جاهز
3/4 كوب ماي او حليب
بيضتين
كوب سكر مطحون
4 م ص حليب
الطريقة
- سخني الفرن على 350 فهرنهايت
- كسري الاوريو -انا استخدم السكين لفرمه عشان ما يكون ناعم- و اخلطيه مع حبيبات الكاكاو و الطحين و الزبده .. و خليه على جنب
- جهزي خليط الكيك و صبي نصه في القالب و حطي عليه كوبين من خليط الاوريو و بعدين حطي باقي خليط الكيك و فوقه باقي الاوريو و رصيه في العجين
- اخبزي الكيكه لمدة 45 الى 50 دقيقة .. او الى ان تستوي
- برديها على الشبك لمدة عشر دقايق و طلعيها من القالب و رديها على الشبك
- خليها تبرد عدل .. خلطي السكر مع الحليب و زينيها مثل الصوره
و بالعافيه عليكم
Permalink
08.31.05
Posted in الحلويات at 1:09 am بواسطة السيدة ماما
أدري .. أدري من زماااااااااااااااااااااااااااا ااااااان ما طليت عليكم و حطيتلكم شي من مطبخي .. انشغلت و الدنيا مشاغل .. بس لا تنسون ، من طول الغيبات ياب الغنايم
و اليوم يايبتلكم طريقه يديده في عمل التشيز كيك .. و هاي الوصفه إهداء خاص لأختنا حرم الدكتور .. تراها هي الي شجعتني و حمستني أرد أشارك معاكم
أول شي سامحوني على الصوره ، مش واضحه و بعد مش حلوه .. بس شا اسوي قلت لازم احط صوره
المقادير
كوبين بسكوت دايجستف مطحون
6 م ك زبدة سايحه
كيس حلاوة الكراميل -حطيتلكم صورة تحت- كمية 14 اونص
علبة ابوقوس صغير
نص كوب جوز مفروم
2 فيلادلفيا مقاس 200 جرام
نص كوب سكر
1 م ص فانيلا
بيضتين
نص كوب حبات كاكاو مذوبه -تشوكلت تشبز-
الطريقه
امزجي البسكوت مع الزبده و رصيهم في قاع و جوانب قالب التشيز كيك و اخبزيهم مدة عشر دقايق
ذوبي حبات الكراميل مع الحليب على نار هاديه و حركي لغاية ما يذوب
صبي على البسكوت و رشي عليه الجوز
في الخلاط اضربي الجبن مع السكر و الفانيلا و ضيفي البيض و امزجي زين
بعدين ضيفي الشوكلاته السايحه و صبي المزيج على الجوز
اخبزي في فرن 350 مدة 45 دقيقه
طلعي من الفرن و بردي برع قبل ما ادخلينه الثلاجه
بردي تمام و قدميه
و لا تنسون القهوه معاه
و بالعافيه على قلوبكم
Permalink
03.23.05
Posted in الحلويات at 1:22 am بواسطة السيدة ماما
طبعا كيكة البرتقال مش جديدة عليكم .. بس جربوا طريقتي .. وااااااااااااااااااااااااااااا ااااااااااااااايد لذيذة .. و طابور عليها ينتظرون قطعة منها .. كان ودي أحطلكم صورة أحلى من هاي .. بس و الله ما عطوني فرصة أقعد أصور صورة عدلة .. و ما بغيت أنتظر يلين ما أسويها مرة ثانية و أصورها عقب .. المهم الطريقة عندكم الحين و ان شاء الله تجربونها و تعيبكم انتو بعد
المقادير
كوب زبدة - يعني 227جرام
كوبين سكر
6 بيضات
كوبين طحين
نص م ص روح البرتقال
3 م ك عصير برتقال
1 م ك عصير ليمون
مبشور برتقالتين -بس ناعم ، ناعمالطريقة
حمي الفرن على 350
ادهني قالب مفتوح من النص
اضربي السكر و الزبده يلين ما يصيرون مثل الكريمة
ضيفي البيضات وحدة ورا الثانيه مع الضرب المستمر
ضيفي المقادير الباقية و اخلطي عدل
صبي الخليط في القالب و خليه في الفرن 45 دقيقة او لغاية ما تستوي
برديها في الفرن 10 دقايق
و بعدين طلعيها وخليها تبرد
الحين سوي التلبيسة
مقادير التلبيسة
كوبين سكر ناعم
4 م ك عصير برتقال
نص م ص روح البرتقال
طريقتها
اخلطيهم كلهم مع بعض و صبيهم على الكيكة الدافيه .. كل ما بينزل في الصحن ، ردي شيلي بالملعقة و صبي على الكيكة
و هني و عافيه
Permalink
03.17.05
Posted in الحلويات at 2:24 am بواسطة السيدة ماما
اليوم يايبتلكم حلاوة لذيييييييييييييييييييييذة .. ما اقدر اوصفلكم لذتها .. و الله من لذتها تحسين بالسعادة -صايره شاعره- بس صدقوني فعلا لذيذة .. خصوصا مع القهوة .. طبقة الاوريو مثل ما تشوفون سوداء و فوقها طبقة الشوكولاته بنيه .. حتى شكلها وايد حلو .. ان شاء الله كلكم تجربونها ، لأنها وااااااااااااااااااااااااااااا اييد سهله و سريعة
المقادير
24 حبة اوريو
نص اصبع زبدة
علبة حليب مركز كبير مقاس 397 تقريبا
كوبين حبيبات الشوكلاتة -chocolate chips
نص كوب جوز مفروم
الطريقة
* اطحني الاوريو و اخلطيه مع الزبده و رصي في قالب بايركس كبير -مدهون طبعا- .. القالب مقاس 13*9 انتش
* على النار ذوبي الحليب مع نص كمية الشوكولاته -لا تخلينه يغلي بس مجرد ذوبان
* صبيه على طبقة الاوريو
* و بعدين رشيه بباقي الشوكولاته و الجوز
* حطي في الفرن على درجة 350 لمدة 20 دقيقة مش اكثر
* قطعيها مربعات صغيره و صفيها بصحن التقديم ، اذا بغيتي ترصينها فوق بعض ، ياريت تفصلين كل طبقة عن الثانيه بورق الشمع عشان ما يلصقون في بعض
و هني و عافية على قلوبكم
Permalink
03.10.05
Posted in الحلويات at 2:42 am بواسطة السيدة ماما
حضري التلبيسة قبل التورتة عشان يكون في مجال تبرد
تلبيسة الموكا
نص كوب سكر
2 م ك نشا
كوب قهوة بارده
3 م ك شوكلاته مره
1 م ك زبدة
2 م ص فانيلا
كوب كريما مخفوقة (حضريه من الدريم ويب)
الطريقة
على النار اخلطي السكر و النشا و ضيفي القهوة الباردة و الشوكلاته بالتدريج و اخلطي يلين ما يتجانسون و يغلظ الخليط
خليه يغلي غلوة وحده ، بعدين ضيفي الزبده و الفانيلا
خليه يبرد تمام و بعدين ضيفيله الكريما
مقادير التورتة
6 بيضات -البياض مفصول عن الصفار
كوب سكر
نص كوب طحين
1 م ص بيكنغ باودر
كوب جوز مفروم ناعم
نص كوب بقسماط
الطريقة
* سخني الفرن و ادهني قالبين مقاس 9 انتش
* اضربي صفار البيض مع ثلاثة ارباع كوب سكر يلين ما يغلظ و بعدين ضيفي الطحين و البيكنغ باودر و اضربي زيادة يلين ما يصير الخليط ناعم
* اخفقي البياض يلين ما يسوي رغوة ، ضيفي باقي السكر و اخفقي زيادة ، ضيفيله الجوز و البقسماط
* ضيفي خليط البياض الى خليط الصفار و حركي
* صبي في القوالب و اخبزي مدة نص ساعة على درحة 350
* خليه يبرد تمام و بعدين لبسيه
* و حطي بالثلاجة
Permalink
03.07.05
Posted in الحلويات at 11:29 am بواسطة السيدة ماما
حلوة ها الكيكة .. الطبقة الي تحت صفراء .. فوقها الطبقة البنية .. شكلها كأنها رخامية .. بس شوي .. .. لأني ما غرزت السكين بعمق عشان الحركة الرخامية تبين كأنها بس من فوق .. مش كل الكيكة .. بعد لذيذة .. ان شاء الله تعيبكم .. اهم مكون من مكوناتها هو ال sour cream .. بعض الناس يسمونه كريما لباني ، او كريمة حامضة .. اختي اذا ما كان متوفر عندها تستعمل لبنة بينار .. بس هي ما جد جربت هاي الكيكة ، يعني ما اقدر اقولكم استعملوا البينار بدال الساور كريم .. الي تبا تجرب على كيفها
ياللا سجلوا عندكم المقادير
المقادير
كوبين و ثلث طحين
كوب و نص سكر
كوب ساور كريم
ثلاثة ارباع كوب حليب
اصبع زبدة
1 م ص بيكربونات الصودا
1 م ص ملح
1 م ص بيكنغ باودر
بيضتين
1 م ص فانيلا
نص كوب chocolate syrup )الي في الغرشة البلاستيك البني و يستعملونه لتزيين الايسكريم، شفت صورته في كذا موضوع في المنتدى -أكيد تعرفونه(
الطريقة
* سخني الفرن على حرارة 350
* ادهني قالب مستطيل مقاس 13*9 انتش
* اخلطي كل المقادير مع بعض ما عادا المقدار الاخير ، و اضربيهم بالخلاط مدة دقيقتين
* احتفظي بمقدار نص كوب من العجين و صبي الباقي في القالب
* اخلطي العجينه الباقية مع chocolate syrup
* و صبي شوي شوي على العجينة الي بالقالب بشكل متساوي قدر الامكان
* بعدين هاتي سكين ، بس لا تغرزينها بعمق في العجين .. عشان التأثير الرخامي يكون بس من فوق
* دخليها الفرن مدة 40 الى 50 دقيقة او يلين ما تستوي
* طلعيها و خليها تبرد تمام و بعدين لبسيها
التلبيسة
6 م ك زبدة او زيت
9 م ك مسحوق كاكاو
كوبين سكر ناعم
ربع م ص ملح
1 م ص فانيلا
ثلث كوب حليب
سيحي الزبده مع الكاكاو على نار هاديه ، ضيفي باقي المقادير و حركي يلين ما يختلطون عدل
حطي القدر على ماعون في ثلج و حركي عشان تحصلين على تلبيسة مناسبة للدهن
لبسي الكيكة و هي بارده
خلي التلبيسة تجمد على الكيكة قبل لا تقطعينها
اذا بغيتي تزينين زيادة .. ذوبي كاكاو ابيض ، و حطي في كيس بلاستيك مخروم و زيني بنفس الطريقة الي انا مسوتنها
و بالعافية على قلوبكم
Permalink
03.05.05
Posted in الحلويات at 10:08 am بواسطة السيدة ماما
من كمن يوم اتخبلت و شريت كرتون نوتيلا ، ما ادري ليش .. ابتلشت شو بسوي به .. ادخل المنتدى ادور
اشياء فيها نوتيلا ما احصل مع اني من قبل شايفة .. بس ناسية اسامي المواضيع
على العموم دخلت السايت مال نوتيلا و شفت فيه كمن وصفة اخترت منها هاذيل و سوبتهم .. بصراحة تستاهل انكم تجربونها .. وايد لذيذة
بسكوت الجوز بالنوتيلا
المقادير
3/4 كوب زبدة -يعني اصبع و نص
1/4 كوب سكر
1/2 كوب نوتيلا
2 1/4 كوب طحين
1 كوب جوز محمص شوي و مطحون
كوبين سكر ناعم
الطريقة
* حرري الفرن على 350
* اضربي بخلاط الكهرباء الزبدة و السكر يلين ما تصير كريمة لونها شبه ابيض
* ضيفي النوتيلا و كملي ضرب
* ضيفي الطحين و الجوز و اضربي بس مش ظروري وايد
* بعدين كوري العجين كور اكبر من حبة البندق شوي
* صفيهم في صينية و حطيهم في الفرن مدة ربع ساعة
* طلعيهم خليهم يبردون شوي
* بعدين غطسيهم في السكر الناعم و حطيهم على شبك -بتلاحظين ان السكر بدا يذوب عليهم، مش مشكلة
* خلي يبرد تمام و بعدين كلوه .. اذا بغيتي سكر زياده رشي عليه عند التقديم
تراه لذيييييييييييييييييييييييييييي ييييييييييييذ .. كلت حبة و بعدين ما قدرت امسك نفسي .. وحده ورا الثانيه
بسكوت الزنجبيل بالنوتيلا
المقادير
2 كوب طحين
1/4 م ص ملح
2 م ص بيكربونات الصودا
1 م ص قرفة
1 م ص مسمار
2 م ص زنجبيل
3/4 كوب زبدة
بيضة
1 كوب سكر
1/4 كوب عسل
الطريقة
* اضربي السكر مع الزبدة بعدين ضيفي العسل و البيضة
* انخلي المقادير الجافة كلها و ضيفيها
* بتصير عندج عجينه شبه لزجة
* كوريها كور صغار قد حبة البندق و حطيها في صينية بعاد عن بعض ، لان مع الحراره بتذوب الكور عشان تسوي دوائر
* حطيها طبعا في فرن حار على درجة 350 مدة ربع ساعة
* خليها تبرد بعدين ادهني نوتيلا على حبة منها و غطيها بالثانية
* و كملي مع باقي البسكوت
بعد لذيييييييييييييييييييييييييييي يييييييييييييييييييذ ، طعم الزنجبيل في البسكوت يلسع شوي مع طعم الكاكاو .. روعة
ترافل النوتيلا بالكازو
المقادير
10 حبات اوريو
كوب كازو محمص -عادي مملح او لا
1/2 كوب سكر ناعم
3/4 كوب زبده
1 كوب نوتيلا
بخاخ زيت
الطريقة
* ييبي قالب مني كب كيكز بو 24 فتحة
*بطني الفتحات بقوالب الورق الحجم الصغير طبعا
* بخيها ببخاخ الزيت او اذا ما عندج ادهنيها شوي بزيت عادي
* اطحني حبات الاوريو ناعم
* صبي ملعقة صغيره من الاوريو المطحون في كل قالب ، و اضغطي بصبعج عليها عشان تلصق بالقاع و الجوانب
* اطحني الكازو مع 1/4 كوب سكر ناعم و ضيفيلها نص صبع زبده و هي في الخلاط ، و اطحني زياده يلين ما تصير مثل المعجون ، و حطيها على ينب
* ذوبي الزبدة الباقية مع السكر الباقي و ملعقتين كبار ماي
* ارفعيهم عن النار و ضيفي النوتيلا و حركي يلين ما يتجانسون
* صبي مقدار ملعقة صغيره من خليط النوتيلا على قوالب الاوريو
* لما تخلصين صبي مقدار نص ملعقة صغيره من خلطة الكازو على النوتيلا و اضغطي عليها شوي -انا استخدم عود الاسنان الخشب- عشان تدخل داخل خلطة النوتيلا
* اذا ما تعمقت داخل صبي شوي زيادة من النوتيلا الباقية
* برديها في الثلاجة نص ساعة و قدميها باردة
هذا الحلو يبين عليه في شغل وايد ، بس بالعكس اذا عندج كل المقادير تخلصين شغله في نص ساعة
Permalink
02.21.05
Posted in الحلويات at 1:34 am بواسطة السيدة ماما
اليوم يايبتلكم طريقة كيكة من ألذ الكيكات الي اسويها .. فعلا وااااااااااااااااااااااااااااا اااااييد لذيذة ، و طريقتها بعد أسهل و أسهل ، مع ان الي بيشوفها ما بيصدق
كل حد كلها اتخبل عليها .. يعني استريحوا مضمونه
أنا عطيتها ها الاسم ، لان فيها خليط من فواكه استوائية .. قلت خلني اسميها كيكة هاواي .. بصراحة ما ادري اذا اصلا في كيكة بها الاسم او لا .. (حقوق الطبع محفوظة عندي)
أتمنى ان كلكم تجربونها لحلاوتها ، و للأعجاب الي بتلقونه من الي بيطعمها .. و بتقولون السيدة ماما قالت 
المقادير
كوبين طحين منخول
2 م ص بيكنغ باودر
1 1/2 م ص بيكنغ صودا
1 م ص ملح
2 1/2 م ص جرفة
كوبين سكر
4 بيضات
1 1/2 زيت
كوبين جزر مبشور ناعم
1/3 كوب جوز مفروم
علبة صغيره اناناس مفروم ناعم
كوب رقائق جوز الهند
الطريقة
شغلي الفرن على 350 و ادهني ثلاث قوالب دائريه مقاس 9 انتش
انخلي المقادير الخمس الاولى مع بعض في ماعون كبير
بعدين ضيفيلها السكر و البيض و الزيت و اخلطي بالخلاط يلين ما يمتزجون
ضيفي الباقي و اخلطي بملعقة كبيره يلين ما يمتزجون
صبي الخليط بالتساوي في القوالب و دخليهم الفرن مدة 35-40 دقيقة
طلعيهم و خليهم يبردون 10 دقايق
بعدين طلعيهم من القوالب و خليهم يبردون تمام
بعد ما يبردون سوي التلبيسة
مقادير التلبيسة
1 جبنة فيلادلفيا 200 جرام(حرارة الغرفة)
1/4 ذايبة كوب زبدة
1 1/4 م ص فانيلا
كوبين سكر ناعم
اخلطيهم كلهم مع بعض بالخلاط يلين ما يصيرون مثل الكريمه
الخطوة الاخيرة
حطي وحدة من الكيكات في طبق التقديم بعدين ادهنيها شوي من التلبيسة ، حطي فوقها كيكة ثانيه و ادهنيها ، و الثالثة و ادهني الكيكة كلها
للتزيين انا احمر شوي من رقايق جوز الهند و ارشها عليها من فوق
ملاحظة
بعد ما تلبسون الكيكة يفضل انكم تحطونها بالثلاجة عشان تجمد التلبيسة عليها شوي
Permalink
02.19.05
Posted in الحلويات at 5:55 am بواسطة السيدة ماما
السلام عليكم خواتي
اليوم يايبتلكم طريقة كيكة بعد حلوة .. الحمدلله كل الي ذاقها عيبته .. المميز فيها اسمها .. Black Majic .. “السحر الاسود” .. و الله مش انا مسمتنها ، اسمها كان جي في الكتاب .. يمكن عشانها سوداء ، و طعمها له مفعول السحر
ان شاء الله اتجربونها و تعيبكم انتو بعد
المقادير
كوب و ثلاثة ارباع كوب طحين
كوبين سكر
ثلاثة ارباع كوب مسحوق كاكاو
2 م ص بيكنغ صودا
1 م ص بيكنغ باودر
1 م ص ملح
بيضتين
كوب قهوه قوية (يعني 2 م ك نسكافيه في كوب واحد ماي)
كوب لبن
نص كوب زيت
1 م ص فانيلا
الطريقة
* ولعي الفرن على 350 و ادهني قالب (الي مفتوح من النص) و رشي بالطحين
* انخلي كل المقادير الجافة و ضيفيلها المقادير الباقية
* و اضربيها بالخلاط دقيقتين على سرعة متوسطة (العجين بيكون سائل)
* اخبزيها في الفرن مدة 30 - 40 دقيقة
تلبيسة الكراميل
كوبين كريما مخفوقة
ثلاثة ارباع كوب سكر اسمر
1 م ص فانيلا
شوية كاكاو مبشور
الطريقة
اخلطي كل المقادير-ماعدا الكاكاو- بالخلاط الكهربائي يلين ما تصير غليظة شوي
صبيها على الكيكة و رشيها بالكاكاو المبشور
ملاحظة
* الأفضل تقطعين الكيكة قبل لا تصبين عليها التلبيسة .. عشان ما تكون صعبة في التقطيع بعدين
* أو تقدرين ما تلبسين الكيكة و اتحطين الكراميل في ماعون ثاني ، و كل ما تقدمين حق حد تحطين شوي من التلبيسة على الكيكة .. أنا افضل احط التلبيسة من قبل و خلاص افتك .. على كيفكم
Permalink
02.17.05
Posted in الحلويات at 1:52 am بواسطة السيدة ماما
أنا أموووووووووووووووت في الكريم كراميل و مش أي طريقة تعيبني .. لأن دايما أخاف من طعم البيض فيه عشان جي دايما أفضل أسوي الجاهز بس لقيت هاي الطريقة في مجلة أجنبية و قلت خلني أجربها لأنها سهلة و مقاديرها كانت متوفره بعد ما سويتها و طعمتها تيننت عليها و اليوم الثاني كنت معزومة و سويت وحده و خذتها معاي .. النسوان تخبلوا من لذتها كل وحدة تبا طريقتها .. لا و بعد في الي زعل لما ما لقى حصة ثانيه .. طبعا انا ما عطيتهم الطريقة .. قتلهم الي تباها تتصل فيني بالتيلفون
المهم انا قلت خلني أكون كريم و أشاركم الطريقة لأن ما شاء الله انتوا ما تقصرون من الوصفات الحلوه
المقادير
3/4 كوب سكر
200 جرام جبنة فيلادلفيا
حليب مركز 397 جرام
حليب بوقوس الكبير (أعتقد 357 جرام)
ملعقتين صغار فانيلا
خمس بيضات
الطريقة
* طبعا تحمرين السكر على نار متوسطة .. لما يصير أحمر غامق صبي على طول في قالب الكريم كارميل عشان ما ييبس و حطي على طرف
*الحين حطي الجبنه في ماعون و اضربيها بخلاط الكيك عشان تصير مثل الكريمه ، بس اذا كانت يابسة بتتعلق في المضرب .. ابدي ضيفي البيض .. بيضة .. بيضة .. يعني بعد اضافة كل بيضة اضربي الكريمة شوي عشان تخلطينهم و بعدين حطي الثانيه
*بعدين ضيفي الحليب المركز و بوقوس و الفانيلا .. اخلطيهم زين و صبيهم على السكر
* حطي قالب الكريم كراميل في جدر أكبر و صبي في الجدر الكبير ماي مقدار 2 سم من القالب * ولعي الفرن على 350 و خلي مدة 50-60 دقيقة
* بعدين طلعي و خلي القالب يبرد عدل .. تقريبا ساعة و نص
* بعد ما يبرد حطي في الثلاجة يلين اليوم الثاني .. يعني خلي يبات فيها
* طبعا عند التقديم فكي اطراف الكريم كراميل بسكين و بعدين حطي صحن عليها و اجلبيها
و صحتين و عافيه
ان شاء الله بعد تعيبكم انتو
ملاحظات
* قوام الكريم كراميل بيكون شوي يابس عشان الجبن
* أنا مره حطيت هيل بالاضافة للفانيلا لأني كنت أحاتي طعم البيض .. بس ما خرب و بعد ما كان له داعي
* لما تون اطلعونها من القالب يمكن تاخذ شوية وقت ، لا تستعيلون .. اذا كنت مستعيلين ييبو جدر في ماي حار و حطو فوق القالب عشان الحراره تساعد
Permalink
« Previous entries · Project-Id-Version: WordPress v1.2.1 - Arabic Language
Report-Msgid-Bugs-To:
POT-Creation-Date: 2004-05-22 18:59-0500
PO-Revision-Date: 2004-12-17 15:12+0300
Last-Translator: Sewar
Language-Team: Sewar
MIME-Version: 1.0
Content-Type: text/plain; charset=utf-8
Content-Transfer-Encoding: 8bit
X-Poedit-Language: Arabic
X-Poedit-Country: SAUDI ARABIA
X-Poedit-SourceCharset: utf-8
Project-Id-Version: WordPress v1.2.1 - Arabic Language
Report-Msgid-Bugs-To:
POT-Creation-Date: 2004-05-22 18:59-0500
PO-Revision-Date: 2004-12-17 15:12+0300
Last-Translator: Sewar
Language-Team: Sewar
MIME-Version: 1.0
Content-Type: text/plain; charset=utf-8
Content-Transfer-Encoding: 8bit
X-Poedit-Language: Arabic
X-Poedit-Country: SAUDI ARABIA
X-Poedit-SourceCharset: utf-8
